خنجر فى قلب فراشه ( ٩ )
الفصل الثانى
كانت صفيه تجلس مع حسونه بيه وبعض بنات العائلة المراهقات فى حجرة الإستقبال بالبيت وكانت ضحكاتهم تتعالى بين الفينة والأخرى - ذلك عندما عاد عبيده مع أخويه زاهر وفتحى عقب لقائهم مع العمدة - فنظر عبيده إليهم وقال متعجبا : الله ! .. هوه أنتوا لسه ولمؤاخذة سهرانين ياجماعة واللا ايه ؟ - فقالت صفيه ضاحكة : لسه سهرانين أيه يا أبو أمين - دا إحنا لسه العِشا ياراجل - فقال عبيده محتجا : عِشا أيه ياصفيه .. دا إحنا داخلين على نص الليل دلوقتى - فقالت صفيه ضاحكة : ماهو نص الليل عندكم يعنى العِشا عندنا فى مصر - ونظرت إلى حسونة وقالت : مش كده ياحسونه بيه ؟ - فقال حسونه بإقتضاب : أيوه - وقالت صفيه ضاحكة : إحنا فى مصر كنا بنصحى بالليل وننام بالنهار - فقال عبيده مبتسما : أيوه من حقكم ياصفيه تسهروا لحد الصبح .. هوه إنتم ولمؤاخذه وراكم أيه ؟ - فقالت صفيه : بس أنا من يوم ما أنا إتجوزت حسونه بيه بقيت أنام بدرى علشان هوه موظف وبيصحى بدرى ولازم أجهز له الفطار - فقال عبيده : طيب إنتم أتعشيتوا واللا لسه ؟ - فقالت صفيه : أيوه يا أبو أمين إحنا إتعشينا والحمد لله - ثم تلفت حواليه وقال : إمال الحريم بتوعنا فين ؟ - فقالت صفيه : يا أخويا النسوان بتوعكم راحوا ناموا من بدرى - فقال زاهر : أصلهم بيصحوا من الفجرية علشان يشوفوا مصلحة الدار - فقالت صفيه : ربنا يكون فى عونهم يا زاهر - وأشارت صفيه إلى عبيده وقالت وهى تنظر إلى حسونه بيه : ده عبيده أخويا الكبير وهوه فى مقام أبويا الله يرحمه - ثم أشارت إلى زاهر وقالت مبتسمة : وده زاهر إللى كان دايما يحملنى على كتفه وأنا صغيره وقوللى إركبى الجمل - وأشارت إلى فتحى وقالت : وده فتحى حبيب قلبى وأصغر إخواتى - فقال حسونه بيه : أهلا وسهلا - وساد الصمت قليلا ثم نظرت صفيه الى إخوتها وقد جلسوا على الكنبة المقابلة وقالت : على فكرة ياجماعة أنا زعلانة منكم قوى - فقال عبيده : زعلانة ليه ولمؤاخذة ياصفيه ؟ - فقالت صفيه : يعنى يصح اللى إنتم عملتوه ده ياجماعة واللا هيه دى الأصول ؟ - فقال عبيده بدهشة : عملنا أيه ولمؤاخذة ؟ - فقالت صفيه : يعنى أنا وجوزى حسونه بيه جايين نقعد معاكم شوية علشان جوزى كان عايز يتعرف عليكم تقوموا تسيبونا وتمشوا ؟ - فقال عبيده : معلهش ياصفيه أصل حضرة العمدة هوه ولمؤاخذة اللى إتأخر علينا قوى لحد ماجه - فنظر زاهر إلى عبيده وقال بثورة عنيفة : أسكت يا عبيده أسكت خالص .. إنت بتخرف بتقول أيه ؟ - فقالت صفيه بقلق : الله ! .. هوه فيه أيه ياجماعة ؟ .. وأنتم كنتم عند العمدة ليه ؟ - وارتبك عبيده ونظر إلى زاهر والذى قال مترددا : لأ ياصفيه مفيش حاجة - فقالت صفيه : يعنى لما مفيش حاجة أمال أنتم كنتم عند العمدة ليه يازاهر ؟ - فقال عبيده مرتبكا : لأ أصل كان فيه مشكلة صغيرة كده وقلنا ناخد رأى حضرة العمدة فيها - فقالت صفيه بلهجة جادة : مشكلة أيه يا أبو أمين ؟ - فقال عبيده : مشكلة ولمؤاخذة صغيرة واتحلت والحمد لله ياصفية - ونظر إلى أخويه وقال : صح ياولاد ؟ - فقال زاهر بضيق وهو يفتعل ابتسامة : يعنى إنت يا عبيده لازم تشغل بال صفيه هيه وجوزها بمشاكلنا ؟ - فقالت صفيه : هوه إحنا أيه وانتم أيه يازاهر ؟ - فقال زاهر بصوت هامس : شوفى يا صفيه أصل إحنا ليلة أول إمبارح كنا بنروى الدرة وبعدين ياستى اللى حصل بقى إن الميه ساحت وغرقت الدره بتاع واحد جارنا .. وبعدين بقى جارنا ده زعل وجه قال لنا يعنى ينفع اللى عملتوه ده ياجماعة تغرقوا الدرة وتبهدلوا الدنيا .. إحنا قلنا له إن اللى حصل ده كان غصب عننا علشان الدنيا كانت ضلام كحل وإحنا مش قاصدين إن إحنا نضرك وحقك علينا - الراجل قال لنا حقك علينا دى أصرفها منين بقى إن شاء الله ؟ .. إحنا قلنا إن إللى حصل كان غصب عننا وخلاص بقى وبلاش تكبر الموضوع - الراجل ماعجبوش الكلام وقال لنا إحنا لازم نحافظ على بعضنا علشان دى مش أول مرة وخد بعضه وراح إشتكانا لحضرة العمدة بس يا ستى أدى كل الحكاية - فقال عبيده : صح هوه ده ولمؤاخذة اللى حصل ياصفيه - فقالت صفيه : طيب وحضرة العمدة عمل أيه ؟ - فقال زاهر : حضرة العمدة قال لنا إنه بكرة ها يبعت شيخ البلد علشان يعاين الدرة ولو كان فيه خسائر إحنا ها نتحملها وخلاص - فقالت صفيه : مين الجار بتاعكم ده ؟ - فقال زاهر : يعنى إنتى لسه فاكرة حد فى البلد ياصفيه - فقالت صفيه : أيوه يازاهر أنا فاكرة كل الناس الكبار - فقال زاهر : طيب ياستى جارنا ده أبوكى محمد أبو بحيرى - وأردف يقول بضيق : وبعدين ياصفيه بلاش تشغلى بالك - وقال عبيده : أصل ولمؤاخذة المشاكل دى بتحصل كل يوم معانا ومع غيرنا - فهبت صفيه واقفه وقالت صفيه : طيب ياللا نروح دلوقتى لعمى محمد وأنا هأدفع له أى مبلغ يطلبه كتعويض عن اللى حصل فى أرضه ونحل المشكلة وخلاص - فقال زاهر : أقعدى ياصفيه الموضوع مش مستاهل - وقال عبيده : وحتى لو فيها غرامة ولمؤاخذة إحنا معانا الفلوس والحمد لله - فقالت صفيه : عموما ياجماعة أى فلوس تطلبوها أنا رقبتى سداده والله - فقال عبيده : ربنا يحفظك ويحميكى ياصفيه - فقالت صفيه مستدركة : إنما قولولى ياجماعة هوه العمدة بتاع زمان لسه موجود ؟ - فقال عبيده : أيوه ياصفيه أبوكى الحاج جابر أبو النجا - فقالت صفيه : ياه دا زمانه كبر قوى - فقال عبيده : ولا كبر ولا حاجة ياستى حتى دا إنتى لما تشوفيه تلاقيه ولمؤاخذة صبى عنى وعنك - فقالت صفيه بدهشة : معقول يا أبو أمين ؟ - فقال عبيده : أيوه بس ركبته هيه اللى بتوجعه شوية - فقالت صفيه : يعنى هوه لسه مفترى زى زمان - فقال عبيده : أيوه ويمكن أكثر من زمان - وأردف يقول : ولسه لسانه طويل وبيشتم وبيضرب زى زمان ويمكن أكتر - ونظر زاهر إلى حسونه وقال : إنت نورت بلدنا ياحسونه بيه - فقال حسونه : شكرا ياحاج - ونظرت صفيه إلى حسونه وقالت : أنا نفسى ياحسونه بيه أوريك العمدة بتاع بلدنا ده - وأردفت تقول :
-------------------------------------
نواصل في الحلقة القادمة إن شاء الله تعالى
تعليقات
إرسال تعليق