خنجر فى قلب فراشه ( ٦ )

 خنجر فى قلب فراشه  ( ٦ )

-------------------------
      وأنا لما سألتها طيب إنتى ولمؤاخذة جايه دلوقتى ليه يابت يا صفية .. البت قالت أصل أنا عايزة أشترى سمنه وزبده وعسل أبيض ولمؤاخذة الحاجات بتاع الفلاحين دى يعنى .. قلنا ماشى خليك مع ولمؤاخذة الكداب لحد باب الدار  .. بعد ييجى قول شهر ويمكن أقل كمان لقينا البت جايه تانى ومعاها لمؤاخذة راجل تانى وهمه راكبين عربية أنقح من العربية الأولانية .. الله ! .. مين الراجل ده يا بت يا صفيه ؟ .. البت قالت دا جوزى .. يا نهار أسود إزاى يابت هوه إنتى ولمؤاخذة متجوزة إتنين واللا أيه ؟ .. البت قالت لأ أنا إتطلقت من شومان بيه واتجوزت طلعت بيه .. أنا إستغربت أكتر وقلت لها عجيبة .. طيب إنتى ولمؤاخذة اتطلقتى من شومان بيه ليه يابت ؟ .. البت قالت أصل شومان كان عيان وأنا مش ها أشتغل ممرضه له .. يعنى يابت تاكليه لحم وترميه ولمؤاخذة عضم يا بت ؟ .. البت ضحكت وقالت أصل لحمه خلص قلت لها يعنى أيه يابت أنا مش فاهم حاجة .. البت قالت أصله طلع بخيل قوى ومش راضى يكتب لى أى عماره من العمارات بتاعته .. أنا ولمؤاخذة زعلت قوى وقلت لها طيب مش المفروض إن إنتى ولمؤاخذة لما تتطلقى ماينفعش تتجوزى إلا لما  العدة بتاعتك تخلص .. البت قالت عدة أيه يا أخويا مصر مفيش فيها عدة ولا الكلام ده  .. أنا إستغربت قوى وقلت لها إزاى يابت الكلام ده ولمؤاخذة .. البت قالت لى المأذون بتاع مصر هوه اللى قاللى كده .. أنا ولمؤاخذة الفار لعب فى عبى وقلت لها أكيد ده مش مأذون يابت يا صفيه .. وبعدين سألتها طيب ولمؤخذة فين القسيمة بتاع الجواز ؟ .. البت ضحكت وقالت قسيمة أيه ياخويا مصر مفيش فيها قسيمة ولا القايمة بتاع الفلاحين دى .. والمهم ياسيدنا وتاج راسنا اللى حصل النهاردة - فقال زاهر بضيق : ياعبيده هات من الآخر علشان الموضوع ... - فنظر إليه العمدة وصاح بثورة عارمة : قلت لك ميت مرة إخرس ياكلب .. إخرس يابهيم  .. إخرس ياحيوان الله ياخرب بيت أهلك .. إنت أيه حمار ما بتفهمش واللا عايزنى اقوم أسود عيشتك ؟ - ومن قذفه بعصاته بقوة  وكادت العصا إن تصيب رأس زاهر لولا أنه انحرف عنها فى الوقت المناسب - ونهض عبيده بسرعة والتقط العصا بيد مرتعشة وأعادها للعمدة وهو يقول بصوت منكسر : معلهش يا حضرة العمدة حقك عليا وسماح علشان خاطرى وأبوس مداسك - بينما إرتاع زاهر بشدة وقال بصوت مبحوح : حاضر حاضر يا سيدنا - وساد الصمت للحظات ونظر العمدة إلى فتحى وقال : هات القلة ياوله - وهب فتحى واقفا وأحضر القلة من صينية بالشباك بها عدة قلل وناولها للعمدة بيد مرتعشة .. ورفعها العمدة وأخذ جرعة ماء ثم ردها إلى فتحى دون أن ينظر اليه ثم ثبت عصاه على الأرض وقبض عليها براحتيه واعتمد عليها بذقنه وسدد نظرات ثاقبة الي عبيده وقال متهكما : وبعدين ؟ - وشعر عبيده بجفاف شديد في حلقه فقال بصوت مبحوح : بعد إذن حضرتك ياسيدنا أشرب بق مية - فهز العمدة رأسه بضيق ونهض عبيده وتناول القلة وأخذ جرعة من الماء ثم عاد إلى مكانه وأردف يقول : والمهم بقى ولمؤاخذة اللى حصل النهاردة - فقال العمدة بتحفز شديد : أيه اللى حصل النهاردة ؟ - فقال عبيده : اللى حصل إن البت صفيه جت النهاردة ومعاها لمؤاخذة راجل جديد خالص .. جدع كده جاهل .. يعنى بتاع تلاتين خمسة وتلاتين سنة بالكتير وشكله كده ولمؤاخذه يعنى خِرِعْ .. يعنى زى العيال بتوع اليومين دول وراكب عربية جديدة لنج وبتلمع قوى - وأنا لما سألتها مين الجدع ده يابت يا صفيه البت قالتلى ده حسونة بيه جوزى الجديد أنا بقى ولمؤاخذة الفار لعب فى عبى الآخر وقلت يانهار إسود يا ولاد أيه الحكايه يابت يا صفيه .. وبقيت ولمؤاخذة أضرب كفا بكف .. وبعدين سألتها تانى زى ما تقول كده ولمؤاخذة يعنى بار وعتب طيب فين القسيمة الجواز واللا قسيمة بتاع الطلاق يابت يا صفيه .. البت قالتلى حاضر يا أخويا الورق كله مع جوزى حسونة بيه .. وحسونة بيه طلع ورق وقاللى دى قسيمة الجواز ودى مش عارف وأنا ولمؤاخذه ماليش لا فى القراية ولا فى الكتابة وقلت أكيد البت دى بتضحك عليا وكلامها ده كله ولمؤاخذة مادخلشى دماغى وقلت بس يبقى اللى فى دماغى طلع صح والدليل أنها جايه وراسها ولمؤاخذة عريانة وكمان لابسه هدوم من الهدوم بتوع البندر يعنى دراعاتها عريانة .. وكمان ولمؤاخذة صدرها يعنى مش عارف بس أقول أيه واللا أيه - ونظر إلى أخويه وقال : صح ياولاد واللا أنا بأكدب ؟ - فهز كل من زاهر وفتحى رأسه وهو يقول بصوت خافت : صح - ونظر عبيده إلى العمدة وقال : لأ والمصيبة الكبيرة أنها ولمؤاخذة لابسة دهب فى إيديها من هنا لحد هنا واللا الحلق اللى في ودانها قد كده .. وكله دهب خالص .. وكله ولمؤاخذة كوم والسيغة اللى فى رقبتها كام دور وعمالة تلعلع فى صدرها كوم .. وأنا لما سألتها إنتى جبتى الدهب ده كله منين يابت يا صفيه البت قالتلى الدهب ده مش بتاعى .. أنا قلت لها آمال الدهب ده ولمؤاخذة بتاع مين يابت ؟ .. البت قالتلى الدهب ده بتاع أحلام بنتى بس قلت ألبسه وأمتع نفسى به شوية .. أنا إستغربت وقلت لها طيب وبنتك جابت الدهب ده كله منين وهيه لسه عيله صغيره قد كده لا راحت ولاجت .. البت قالتلى الدهب ده كله هدايا .. وكمان قالتلى أصل أنا كنت بأشتغل عند ستات مبسوطين قوى قوى بس من يوم ما إتجوزت حسونه بيه بطلت أشتغل علشان جوزى حسونه بيه موظف كبير قوى فى الحكومة وغنى قوى ومن عيلة كبيرة وغنية .
    ولاذ عبيدة بالصمت قليلا ثم قال : آدى الموضوع بتاعنا ياحضرة العمدة - فقال العمدة متهكما وهو يهز رأسه : وبعدين ؟ - فقال عبيده : وبعدين أنا بقى قعدت مع اخواتى وفكرنا وقلنا نيجى لحضرتك نقولك الحكاية وعلشان ناخد رأى حضرتك - فحدق العمدة فيه ثم قال متحفزا : والمطلوب ؟ - فقال عبيده : المطلوب إن حضرتك تدلنا.. تنورنا .. تنصحنا .. تقول لنا نعمل أيه .. مش إنت حضرتك كبير البلد وسيدنا وتاج راسنا واللا أيه ؟ - وأردف يقول :
------------------------
نواصل في الحلقة القادمة إن شاء الله تعالى